Қазақстанда жануарларға қатыгездік жасағаны үшін 14 жасынан бастап қылмыстық жауапкершілікке тарту ұсынылды.
“Қылмыстық жауаптылық жасын 14 жасқа дейін төмендету ұсынылды, бұрын ол 16 жас болатын”, – деді ІІМ Әкімшілік полиция комитетінің арнайы тапсырмалар жөніндегі аға инспекторы Айбек Өскембаев ОКҚ брифингінде.
Сондай-ақ, 316-бап – “Жануарларға қатыгездік жасау” бойынша айыппұл түріндегі санкцияны екі мың АЕК-тен бес мың АЕК-ке дейін, қоғамдық жұмыстарды – 600-ден 1000 сағатқа дейін күшейту және екі жылдан бес жылға дейін бас бостандығын шектеу немесе айыру ұсынылды.
“Қылмыстың өзі қылмыстық теріс қылықтар қатарынан жалпы ауырлығы орташа қылмысқа ауыстырылады. 5 жылға дейін бас бостандығынан айыру жазасы көзделеді. ӘҚБтК-нің 408-бабы – “Ауыл шаруашылығы жануарларын жаю ережелерін, иттер мен мысықтарды ұстау және серуендету ережелерін, қаңғыбас иттер мен мысықтарды аулау және жою ережелерін бұзу” бойынша ескерту түріндегі жазаны алып тастауды ұсынамыз. 408-баптың 2-бөлігінде айыппұлды 10-нан 20 АЕК-ке дейін ұлғайту. Бұл ұсыныстарды ІІМ бас прокуратураға енгізді, онда ұсыныстар мақұлданды. Болашақта жұмыс топтарының отырыстарында қаралған кезде бұл нормалар өз орнын табады деп ойлаймын”, – деп толықтырды Өскембаев.
Бұған дейін ҚР экология, геология және табиғи ресурстар министрлігі жануарларға қатыгездік көрсеткені үшін айыппұлды 2000 АЕК-ке дейін арттыруды ұсынған еді.
