Бүгін, 26 маусымда Қарағанды облысы Нұра ауданы Қайнар ауылынан батысқа қарай 20 шақырым жердегі Құлан өзенінен 86 бас киік лақтарының өлексесі табылды. Экология және табиғи ресурстар министрлігі осы оқиғаға қатысты түсініктеме берді, деп хабарлайды ҚазАқпарат.
«Охотзоопром» ӨБ» Орталық өңірлік филиалының Қарағанды тірек пунктінің инспекторлары сирек кездесетін және жойылып бара жатқан жабайы тұяқты жануарларды және киікті қорғау бойынша Қарағанды орман шаруашылығы және жануарлар дүниесі аумақтық инспекциясы, сондай-ақ Табиғат қорғау полициясы қызметкерлерімен бірлескен іс-шаралар жүргізу барысында, Қарағанды облысы Нұра ауданы Қайнар ауылынан батысқа қарай 20 шақырым жердегі Құлан өзенінен барлығы 86 бас киік лақтарының өлексесі табылды. Жануарлардың өлекселері бұзылып бастағандықтан олардың жынысын анықтау мүмкіндігі болмады, сондай-ақ терінің жоғарғы қабатында оқ іздері табылмады (қылмыстық іздер жоқ)», – деп жазылған министрлік хабарламасында.
Жануарлар өзеннен өткен кезде суға батып кеткен. Киік өлекселері судан алынып, арнайы полигонға апарылып, жойылды.
