Қарағандылық автопарк басшылары қоғамдық көлікте сараланған тариф енгізілгеннен кейін не өзгергенін облыс әкіміне баяндады. Олардың айтуынша, автобус жүргізушілері кесте бойынша жұмыс істеп жатыр, жолаушы жинаймыз деп жарысуды да доғарған.
Өңір басшысы тұрғындардан автобус жұмысына қатысты шағымдар әлі де көп түсіп жатқанын атап өтті.
Қарағандылықтар қоғамдық көлікті ұзақ күтетініне және салондардың лық толы болатынына наразылық білдірген.
Облыста 203 тұрақты маршрут жұмыс істейді. 39 тасымалдаушы қызмет көрсетеді, автопарктерінде 900-ден астам автобус бар.
«Биыл пандемияға байланысты жабылған жеті ауданаралық бағытта қозғалыс қалпына келді. Серіктес қалалар Теміртау, Шахтинск, Саран, Абай қалалары, сондай-ақ Топар және Шахан кенттері бағытындағы алты ауданаралық маршруттармен қамтылған. Жыл сайын осы маршруттарда 5,5 миллионнан астам адам тасымалданады. Желіде № 3 және 5 автопарктер жұмыс істейді», – деді жолаушылар көлігі және автомобиль жолдары басқармасының басшысы Сәбит Оспанов.
Ол сондай-ақ автобустардың желіге шығуына күнделікті бақылау жүргізіліп жатқанын атап өтті.
Жолаушылар Bus09 қосымшасы арқылы нақты уақыт режимінде қала маңындағы автобус қозғалысын бақылай алады.
Осы жылдың қыркүйек айында Қарағанды – Абай бағыты бойынша «Мерседес» маркалы 10 автобус іске қосылды.
Қарағанды – Теміртау және Қарағанды – Шахан бағыттарында әлі де түйткілді мәселелер баршылық.
Бұл проблемаларға себеп – көліктердің ескіруі және жүргізуші жетіспеушілігі.
Қарағандыда 224 бос жұмыс орны бар. Көлікті жаңартуға келетін болсақ, № 5 автопарк өнеркәсіпті дамыту қорына 58 жаңа автобус – 50 қалалық және 8 қала маңындағы автобус сатып алуға өтінім берді.
№ 3 автопарк келесі жылы 30 жаңа автобус сатып алмақшы.
«Жолаушылар тарапынан шағымдарды қадағалап, жедел әрекет ету қажет. Автокөлік комбинаттары бүкіл міндеттемелерін орындауы тиіс. Өткен жылы және биыл біз субсидияны едәуір арттырдық. Көлікті жаңарту, электронды билетті енгізу – мұның бәрі сервисті жақсартуға бағытталған», – деп атап өтті Жеңіс Қасымбек.
Алайда шағымдар тек тасымалдаушыларға ғана қатысты емес. Қоғамдық көлікте жолақы төлемейтіндер көбейіп кетті.
Қазір Қарағандыда № 3 автопарктің 50 бақылаушысы және eBay компаниясының 30 бақылаушысы жұмыс істейді.
Әзірге олар жолаушыларға жол жүру жауапкершілігі туралы ескерту жасап жатыр.
Желтоқсан айында сөзден әрекетке көшеді. Бақылаушылар полиция қызметкерлерімен бірге шығып, жолақы төлемегендерге айыппұл салады.
