12 қарашада А91 көшесінен Астана-Қарағанды тасжолына дейінгі аралықта орналасқан А62 көшесіндегі қозғалыс ашылады. Бұл туралы novoetv.kz елорда әкімдігінің Facebook-тегі ресми парақшасына сілтеме жасап хабарлайды.
«12 қараша, сенбі күні А91 көшесінен Астана-Қарағанды тасжолына дейінгі аралықты қамтитын А62 көшесіндегі қозғалыс ашылады. Бұл көше Қарағанды тасжолы, «Нұрлы Жол» вокзалы және қаланың сол жағалауы арасындағы көлік қатынасын қамтамасыз етеді. Осылайша, Нәжімеденов, Байтұрсынов көшелеріндегі көлік ағыны азаяды, транзиттік көліктердің бір бөлігі Қошқарбаев, Абылайхан даңғылдары мен Айнакөл және Қобда көшелері арқылы өтеді», – делінген әкімдіктің әлеуметтік желідегі парақшасында жарияланған хабарламада.
А62 көшесі негізінен 8 жолақты. Дегенмен бүгінгі таңда бұл көшедегі жөндеу жұмыстардың бір бөлігі ғана аяқталған. Сондықтан әзірге 4 жолақ бойынша қозғалыс ашылады. Әкімдік мәліметінше, қалған 4 жолақты іске қосу жұмыстары көктемде жалғасады.
