Қазақстан президенті Қасым-Жомарт Тоқаев онлайн-кассалар мен POS-терминалдарды пайдаланатын жеке кәсіпкерлерді салық есептілігінен босатуды тапсырды.
Президенттің айтуынша, дағдарыс ұлттық экономиканың бұрыннан келе жатқан мәселелерін жарқын көрсетіп берді. Маңызды жүйелік саясаттың бірі – салық саясаты – экономиканың жаңа құрылымының қалыптасуын ынталандыруы керек.
“Дағдарысқа қарсы шаралар аясында біз салықтық ынталандырулардың кең спектрін ұсындық. Олардың барлығы өздерін ақтады”, – деді Тоқаев.
Мемлекет басшысы қазір қалпына келтіру кезеңінде Қазақстан үкіметі салық-бюджет саясатын жаңа жағдайда жетілдіру жөнінде ұсыныстар әзірлеуі керек екенін атап өтті.
“Салықты әкімшілендіру мәселесі де өте маңызды. Соңғы айларда кәсіпкерлердің салық органдарына шағымдары жиілей бастады. Ең төменгі берешек үшін шоттар бұғатталады, есептілікті қабылдау жүйесі үнемі қатып қалады, экспорт шектеледі себепсіз және т.б.”, – деді ол.
Президенттің айтуынша, аванстық төлемдер есебінен бюджетті орындау мақсатында адал кәсіпкерлерге қысым көрсетілуде.
“Бұл тәжірибені тоқтату керек. Үкіметке “Атамекенмен” бірлесіп, салықтық әкімшілендіруді түбегейлі оңайлату және жұмсарту жөнінде ұсыныс әзірлеуді тапсырамын. Ол цифрлық шешімдерге, ауқымды деректерді пайдалануға және блокчейн технологияларына негізделуі тиіс”, – деп толықтырды Тоқаев.
Ол, атап айтқанда, жеке кәсіпкерлерді онлайн кассалық аппараттар мен POS-терминалдарды пайдаланған жағдайда салық есептілігін ұсынудан босату туралы мәселені қарауды бүйырды.
