Мемлекет басшысы Қасым-Жомарт Тоқаев Қазақстан халқына арнаған Жолдауында елде екінші, тіпті үшінші атом электр станциясын салу жоспарын әзірлеуді тапсырды.
Президенттің айтуынша, қазіргі таңда елімізде энергия көздерін жан-жақты жаңғырту жұмыстары жүріп жатыр, шетелдік инвесторлардың қатысуымен ірі жобалар жүзеге асуда. Алдағы бес жыл ішінде қуаты 6,3 гигаватт болатын жаңартылатын энергия көздері іске қосылады. Бұл Қазақстандағы «жасыл» энергия үлесін айтарлықтай арттырмақ.
Алайда Тоқаевтың сөзінше, негізгі мақсат – энергияны әртараптандыру ғана емес, еліміздің энергия жүйесінің нақты әлеуетіне және ұзақмерзімді ұлттық мүдделеріне сай тұрақты даму жолын қамтамасыз ету. Осы тұрғыдан алғанда, ядролық энергетиканы дамыту ерекше маңызға ие. Президент Алматы облысында алғаш атом электр станциясы жобасының «Росатоммен» бірлесіп іске асырыла бастағанын еске салып өтті. Дегенмен бұл жалғыз жоба жеткіліксіз екенін айтып, екінші және үшінші станциялардың құрылысын жоспарлауды қазірден бастау қажет екенін атап өтті.
Сондай-ақ Тоқаев Қытайға сапары барысында екі ел арасында атом энергетикасы саласында стратегиялық әріптестік орнағанын ерекше атап өтті.
Президенттің айтуынша, Қазақстан энергетикалық дербестікке қол жеткізу мақсатында әлемдік компаниялармен өзара тиімді серіктестік орнатуға дайын. Сонымен қатар, елдегі мол көмір қорын экологияға зиян келтірмейтін заманауи технологиялар арқылы тиімді пайдалану қажеттігін айтты. Өз сөзінде ол табиғи ресурстарды ұтымды әрі халық игілігіне жарату маңызды екенін баса айтты.
