Президент Қасым-Жомарт Тоқаев Қазақстан халқына Жолдауында қоғамдағы тәртіпсіздік, дөрекілік пен мәдениетсіздік мәселесіне ерекше назар аударды. Ол мұндай жағымсыз көріністердің жиілеп бара жатқанына алаңдаушылық білдіріп, бұл еліміздің халықаралық аренадағы беделіне нұқсан келтіретінін айтты, деп хабарлайды Ақорда.
«Заң мен тәртіп – мемлекетіміздің іргетасы», – деді Президент. Оның айтуынша, құқық бұзушылыққа мүлдем төзбеу қағидасы барлық мемлекеттік органдар мен азаматтар үшін ортақ ұстанымға айналуы тиіс.
Президент қазіргі қоғамда адамдардың бір-біріне тіл тигізіп, дауласуы, тіпті төбелесуі жиілегенін атап өтті. Мұндай көріністер әсіресе қоғамдық орындар мен жол-көлік қатынастарында көп кездеседі.
«Қоғамдық тәртіпті бұзып, балағат сөздер айтатындардың арасында әйелдер де кездесіп жүр. Бұл – өркениетті қоғамға жат қылық», – деді Тоқаев.
Ол халықты өзара сыйластық пен мәдениетке бет бұруға шақырды. Ұлы Абайдың «Біріңді қазақ, бірің дос көрмесең, істің бәрі бос» деген сөзін мысалға келтіріп, тәрбиенің әр азамат пен отбасынан басталатынын айтты.
Тоқаев қазіргі алмағайып кезеңде басты міндет – елдің бірлігін сақтау, жеріміздің тұтастығын нығайту екенін баса айтты. Оның пікірінше, ішкі тұрақтылық пен татулық болса, кез келген сынақтан сүрінбей өтуге болады.
Патриотизм туралы да жаңа көзқарас ұсынылды. Президент қазіргі жастар Отанға деген сүйіспеншілікті жаңашылдықпен, пайдалы іспен дәлелдеуді жөн санайтынын айтты. Олар үшін елге қызмет ету – технологияны игеру, жаңа жобалар жасау, қоғамға нақты пайда әкелу.
«Жастар әсіреұлтшылдықты да, діни радикализмді де қолдамайды. Олар Қазақстанды озық, дамыған ел ретінде көреді. Мен бұл көзқарасты толық қолдаймын», – деді мемлекет басшысы.
Президент ғылым мен білімге ұмтылған жастарға жан-жақты қолдау көрсетілетінін, қолға алынған барлық реформалар болашақ ұрпақ үшін жасалып жатқанын айтты.
«Абай айтқандай, жақсы адам болу – ақыл мен білімнен басталады. Ал менің ойымша, дамыған елдің басты белгісі – әділ заң, сапалы басқару, әрі белсенді, саналы азаматтар», – деп түйіндеді Тоқаев.
Ол әрбір мемлекеттік шешім халықтың әл-ауқатын арттыруға, экономиканы нығайтуға және әлеуметтік әділдік орнатуға бағытталуы тиіс екенін атап өтті.
«Бүгінде Қазақстан ауқымды реформалар арқылы жаңғыру жолына түсті. Енді алға ғана жылжып, бағдарымыздан таймауымыз қажет», – деді Президент Жолдауында.
