«Сары-Арқа» халықаралық әуежайында аса қауіпті инфекциялармен күреске бағытталған оқу-жаттығу өткізілді.

Оқу-жаттығуға Қарағанды қаласының санитариялық-карантиндік бақылау мамандары, Астана қаласының санитариялық-карантиндік бақылау бөлімінің өкілдері, сондай-ақ Қарағанды облысы санитариялық-эпидемиологиялық бақылау департаментінің, облыстық денсаулық сақтау басқармасының, Қарағанды облысы бойынша «Ұлттық сараптама орталығы» ШЖҚ РМК филиалының, көліктегі санитариялық-эпидемиологиялық бақылау Қарағанды бөлімшелік басқармасының, желілік полиция бөлімінің, шекаралық және кедендік қызметтердің, сондай-ақ әуежай қызметінің өкілдері қатысты. Оқу-жаттығулар халықаралық рейстермен келетін жолаушылар арасында карантиндік аса қауіпті жұқпалы аурулар анықталған жағдайда шұғыл алдын алу және эпидемияға қарсы іс-шараларды жүргізуге дайындықты тексеруге бағытталды.

– «Оқу-жаттығудың мақсаты – халықаралық рейстермен келетін жолаушылар арасында инфекцияға күмәнданылған науқас анықталған жағдайда қызметтер арасындағы өзара әрекеттесудің тиімділігін бағалау», – деп хабарлады ұйымдастырушылар.

Оқу-жаттығулар барысында температурасы жоғары жолаушының жағдайы модельденді. Байланыста болған тұлғаларды оқшаулау, науқасты ауруханаға жатқызу, шектеу шараларын ұйымдастыру және мамандандырылған құрылымдар арасында үйлестіру бойынша іс-әрекеттер пысықталды.

– «Біз санитариялық-карантиндік қызметтердің, медициналық мекемелердің, құқық қорғау және шекаралық органдардың аса қауіпті инфекцияның ықтимал таралуы жағдайында қаншалықты үйлесімді әрекет ете алатындығын тексердік», – деп атап өтті қатысушылар.

Оқу-жаттығулар жоспарланған тақырып аясында өткізіліп, тиісті құрылымдардың көлік саласында инфекциялық аурулар анықталған жағдайда жедел әрекет етуге дайын екендігін көрсетті.