«Дәуір бейнесі»: Қарағандылықтарды суретші Петр Антоненконың туындыларымен танысуға шақырады

Қарағандыда белгілі суретші, Қарағанды суретшілер одағының негізін қалаушылардың бірі Петр Антоненконың көрмесі өтеді. «Алтын ғасыр» галереясында суретшінің мұрагері табыстаған сирек кездесетін туындылар көпшілік назарына ұсынылады.

«Дәуірдің көрінісі» атты көрме Қарағанды қаласының 1950-1970 жылдар аралығындағы даму тарихына арналып отыр. Экспозицияға сол кезеңде Петр Антоненко салған акварельдік жұмыстар, этюдтер мен графикалық туындылар енгізілген.

– Көрмеге ұсынылған жұмыстарды бізге суретшінің мұрагері Любовь Антоненко берді. Жалпы саны 80-ге жуық туынды бар. Олардың ішінде акварель мен графикалық суреттер көп, – деді «Алтын ғасыр» галереясының жетекшісі Бибігүл Исполова.

Петр Антоненко 1921 жылы Шығыс Қазақстан облысында дүниеге келген. Ол Самарқанд пен Алматыда белгілі ұстаздар Павел Беньков пен Абрам Черкасскийден тәлім алған. Алғашқы шығармаларын 1948 жылдан бастап жариялай бастады.

Суретші Қарағандыда түрлі жанрда еңбек етті: портрет, пейзаж, натюрморт, сонымен қатар монументалды мозаика мен суреттер де жасаған. Оның шығармаларында қарағандылықтардың күнделікті өмірі, қаланың көшелері мен тарихы көрініс табады.

Антоненконың кейбір жұмыстары Ә.Қастеев атындағы Мемлекеттік өнер мұражайы мен жеке коллекцияларда сақтаулы.

Суретшінің шығармашылығымен танысқысы келетіндер 30 тамыз күні сағат 16:00-де «Алтын ғасыр» галереясына келе алады. Көрмеге кіру тегін. Шара 10 қыркүйекке дейін жалғасады.