Қазақстанда 2027 жылы жалпыұлттық референдум өткізілуі ықтимал. Бұл туралы Президент Қасым-Жомарт Тоқаев халыққа арнаған Жолдауында мәлімдеді.
Бұған дейін мемлекет басшысы елде бір палаталы парламент құру жөнінде бастама көтерген болатын. Оның айтуынша, бұл — аса маңызды әрі жауапты реформа, сондықтан оны асығыс енгізуге болмайды.
«Мұндай өзгерістер алдымен сарапшылар, азаматтық қоғам өкілдері мен қазіргі парламент арасында кеңінен талқылануы тиіс. Бұл бастаманың маңыздылығын ескеріп, қоғамда кемінде бір жыл бойы пікір алмасу қажет деп санаймын. Содан кейін, 2027 жылы, жалпыхалықтық референдум өткізуге болады. Егер халық қолдаса, Конституцияға тиісті өзгерістер енгізіледі», – деді Тоқаев.
Президент еліміздің тағдырына тікелей әсер ететін барлық реформалар тек халықтың келісімімен ғана жүзеге асуы тиіс екенін атап өтті. Егер қоғам бір палаталы парламент қажет деген ортақ шешімге келсе, депутаттар тек партиялық тізім бойынша сайлануы керек екенін айтты.
Сондай-ақ, мемлекет басшысы Мәжіліс қазіргі құрамы заңдық үдерістер аяқталғанға дейін өз жұмысын жалғастыратынын, ал Сенат пен саяси партиялар жаңа кезеңге дайындала беруі тиіс екенін жеткізді.
«Депутаттар бұл мәселені үлкен жауапкершілікпен қабылдайды деп сенемін. Себебі барлық саяси реформалар еліміздің тұрақты институционалды құрылымының маңызды бөлшегі болуға тиіс», – деді ол.
Президент реформа жайлы ерте жария ету себебін де түсіндірді.
«Көпшіліктің көкейінде заңды сұрақ туындауы мүмкін: неліктен бұл бастама туралы алдын ала айтылып отыр? Өйткені саясатта мұндай өзгерістер көбіне күтпеген жерден жасалуы керек деген ұстаным бар. Бірақ мен бұрыннан айтып келемін және тағы да қайталаймын – мұндай ауқымды, ел тағдырына әсер ететін реформалар ашық талқылануы тиіс. Халықтан жасырып, жабық түрде шешім қабылдауға болмайды. Сондықтан қоғаммен ашық диалог жүргізіп, бәріміз бірге әділетті, қуатты Қазақстан құру жолында алға жылжуымыз қажет», – деді Қасым-Жомарт Тоқаев.
