Қазақстан ең төменгі жалақыны анықтау әдістерін халықаралық деңгейде бекітетін болады.
Бүгін Мәжілістің жалпы отырысында депутаттар «Ең төмен жалақыны белгілеу туралы» №131 конвенцияны ратификациялады. Бұл құжат дамушы елдердің жағдайын ескере отырып, жалақыны белгілеу тетіктерін айқындайды.
№131 конвенцияны ратификациялау Қазақстан үшін нені білдіреді:
-
Қазақстанда ең төменгі жалақыны анықтау жүйесі халықаралық деңгейде заңдастырылады;
-
Бұл қадам елдің Халықаралық еңбек ұйымы алдындағы міндеттемелерге бейілділігін дәлелдейді.
Құжатта келесі негізгі қағидаттар көрсетілген:
-
ең төменгі жалақы жүйесін қалыптастыру;
-
әлеуметтік әріптестердің (жұмыс берушілер мен қызметкерлер өкілдерінің) жалақыны белгілеу және қайта қарау процесіне қатысуы;
-
ең төменгі жалақыны айқындауда жұмысшылардың қажеттіліктері мен экономикалық көрсеткіштердің ескерілуі;
-
еңбекақы төлеуде кемсітушілікке жол бермеу.
Қазақстан 1993 жылдан бері Халықаралық еңбек ұйымының мүшесі болып табылады және осы уақыт ішінде еңбек жағдайлары мен әлеуметтік қорғауға қатысты 28 конвенцияны ратификациялаған.
Қазіргі таңда №131 конвенцияны 54 мемлекет бекіткен, оның ішінде ТМД елдерінен Армения мен Әзербайжан бар.
