«Қазақмыс» кен орындарын нақты модельдеуде жасанды интеллект технологияларын қолдана бастады.
«Қазақмыс» компаниясы кен барлау және өндіру саласында жасанды интеллект (ЖИ) технологияларын кеңінен қолдана бастады. 2025 жылғы мамырда іске қосылған заманауи Micromine Advance жүйесіне енгізілген Grade Copilot модулі кен орындарын бұрынғыдан да нақты және жедел модельдеуге мүмкіндік береді. Бұл технология өндіріс тиімділігін арттырып, деректердің дәлдігін қамтамасыз етеді.
Аталған бастама — президент Қасым-Жомарт Тоқаев айқындаған цифрландыру саясатының нақты жүзеге асуы. Мемлекет басшысы ЖИ технологияларын «қуатты, әділ және қауіпсіз Қазақстан құру жолындағы маңызды құрал» ретінде атап өткен болатын. «Қазақмыс» бұл идеяны өндірісте сәтті қолданып, цифрлық трансформацияның үлгісін көрсетіп отыр.
Ташкенттегі Micromine конференциясында компания өкілдері жаңартылған жүйенің алғашқы нәтижелерін таныстырды. Геологиялық барлау департаментінің директоры Бекасыл Аукешев Ұлыбританиялық Weir Group Digital және америкалық Greg Slater бастаған делегациямен келіссөздер өткізіп, ЖИ шешімдерін дамыту, мамандарды оқыту және бағдарламаларды жетілдіру мәселелерін талқылады.
Қазіргі уақытта компания геологиялық деректерді толық цифрлық форматқа көшіру жұмыстарын жүргізіп жатыр. Барлық ақпарат бірыңғай корпоративтік стандартқа сай жүйеленуде. Micromine шешімдері барлау кезеңінен бастап өндіріске дейінгі бүкіл процестерге енгізілген.
2025 жылдың соңына дейін компания Micromine Advance пен Alastri жүйелерінің жаңа модульдерін енгізуді көздеп отыр. Бұл өндірістік процестерді толық цифрландыруға мүмкіндік бермек.
Конференция барысында геолог Жан Шомытов Жаман-Айбат кен орнын зерттеу нәтижелерін ұсынды. Micromine көмегімен мамандар мыстың минералдануы мен тектоникалық құрылымдар арасындағы байланысты анықтап, ЖИ технологиясының геологиялық талдаудағы тиімділігін дәлелдеді.
Бүгінде «Қазақмыс» құрамында Micromine-мен жұмыс істейтін 400-ден астам маман бар. Компанияда 300-ге жуық лицензия және 1400-ден аса модуль тіркелген. Геологиялық ақпараттың 90%-ы цифрланған. Сонымен қатар, 500-ден аса қызметкер арнайы оқудан өтіп, халықаралық сертификаттар алған.
Осылайша «Қазақмыс» Қазақстанның тау-кен өндірісі саласындағы цифрландыру көшбасшысы ретінде өз позициясын нығайтып, президент тапсырмаларын тиімді жүзеге асырып келеді.
