Спорт
Қарағандылық оқушылар республикалық шахмат лигасында күміс жүлдеге ие болды
9–11 сынып оқушылары арасында шахматтан өткен Ұлттық мектеп лигасының республикалық кезеңі Талдықорғанда өтті және өз мәресіне жетті. Қарағандылық команда күміс медальмен оралып, үлкен жетістікке жетті, деп хабарлайды novoetv.kz.
Турнирге еліміздің барлық өңірлерінен шамамен 60-қа жуық оқушы қатысты.
Қарағанды атынан сайысқа әл-Фараби атындағы мектеп-гимназиясының төрт оқушысы — Рауан Тұсбаев, Камшат Ерғали, Нұрасыл Дәулетбеков және Азамат Ғалымқадыр қатысты.
Команда мүшелерінің барлығы бала кезден шахматқа әуес болып, бос уақыттарында осы спорт түрімен айналысуды жалғастырып келеді. Сонымен қатар, оқушыларды дене шынықтыру пәнінің мұғалімі Дәулет Кеңесбай жаттықтырады.
— Қарсыластар өте мықты болды, бірақ біздің балалар намысты қолдан бермей, жақсы өнер көрсетті. Әрине, қобалжу нәтижеге әсер етті — мүмкін, дәл осы уайымның салдарынан олар көбірек ұпай жинай алмады, дегенмен олардың әлеуеті жоғары, — деді жаттықтырушы.
