Қарағанды облысында Жастар істері жөніндегі кеңестің кезекті отырысы Жастар күніне орай ашық диалог форматында өткізілді.
Бейресми жағдайда өткен шараға жастар ұйымдарының көшбасшылары, саяси бірлестіктердің өкілдері және жаңа буын белсенділері жиналып, өңірдің әлеуметтік-экономикалық дамуына ықпал ететін бастамаларды талқылады.
Облыс әкімі Ермағанбет Бөлекпаев жиында еңбек, білім беру және жастардың өзін-өзі дамыту мәселелері бойынша ұсыныстарды бірге қарастыруға, сондай-ақ жаңа идеяларды қолдауға әзір екенін білдірді.
— Бізге ашық әрі мазмұнды әңгімелер қажет. Қай жобалар іске қосылғанын, қайсысы әлі жоспарлау сатысында екенін және қай бағытта қосымша қолдау қажет екенін нақты білу маңызды, — деді өңір басшысы. — Мемлекет басшысы жастардың өсуі мен өзін-өзі дамытуына жағдай жасау қажеттігін жиі атап өтеді. Осы бағытта біздің облыста нақты нәтижелер бар.
Қазіргі уақытта өңірде жастарға арналған ресурстық орталықтар жұмыс істейді, жас кәсіпкерлерді қолдау бағдарламалары жүзеге асырылуда. Сондай-ақ, бизнес бастауға ниет білдіргендерге гранттар бөлініп келеді.
Кездесу барысында көтерілген маңызды бастамалардың бірі — Жұмысшы мамандықтары форумын өткізу ұсынысы болды. Бұл туралы облыстық кәсіподақ орталығы жанындағы «Келешек» жастар кеңесінің төрайымы Аймира Баграмова айтып өтті. Оның пікірінше, форум жұмысшы жастардың құқықтарын қорғау, лайықты еңбек қағидаларын насихаттау және техникалық мамандықтардың беделін арттыруға бағытталған.
— Мұндай деңгейдегі форум өңірімізде әлі өткізілген жоқ. Жұмысшы мамандықтар жылы аясында бұл бастама ерекше мәнге ие. Біз халықаралық сарапшыларды шақырып, тәжірибе алмасуды жоспарлап отырмыз, — деді Аймира Баграмова. — Жұмысшы жастар көбіне назардан тыс қалады, ал бұл жоба олардың мәртебесін көтеруге септігін тигізеді.
Облыс әкімі Ермаганбет Бөлекпаев бұл ұсынысты қолдап, Қарағанды облысында жарты миллионға жуық жұмысшы мамандығы иелері бар екенін, бұл республиканың ең жоғары көрсеткіштерінің бірі екенін атап өтті.
Кездесу барысында сонымен қатар білім беру сапасы, жастарды жұмыспен қамту, креативті индустрияларды дамыту және волонтерлік қызметті дамыту мәселелері талқыланды.
Жиын соңында облыс әкімі жастар саясатын дамытуға елеулі үлес қосқан және өңір үшін маңызды бастамаларды іске асырған белсенділерге алғыс хаттар табыс етті.
