Қарағанды облысында Qarmet компаниясы жаңа ыстық мырыштау және полимерлі жабындар кешенінің құрылысын бастады. Жобаның жалпы инвестициялық көлемі – 84 миллиард теңге. Бұл бастама 350 жаңа жұмыс орнын ашуға жол ашады. Кешенді пайдалануға беру 2027 жылға жоспарланған.
Бұл туралы компанияның баспасөз қызметі мәлімдеді.
Компания өкілдерінің айтуынша, жаңа өндірістік желілер Qarmet болат өндірісі дивизионының қуаттарын жаңарту мен кеңейтуге бағытталған стратегиялық бағдарламаның бір бөлігі болып табылады. Бұл бағдарлама Мемлекет басшысы Қасым-Жомарт Тоқаевтың еліміздегі ірі тау-кен металлургия кәсіпорындарын жаңғырту жөніндегі тапсырмасына сәйкес жүзеге асырылып жатыр.
Жабдықтарды жеткізу үшін халықаралық деңгейдегі беделді инжинирингтік компания – бельгиялық John Cockerill фирмасы таңдалған.
Қазіргі таңда Qarmet металлургия комбинатында жылына 592 мың тонна өнім беретін екі ыстық мырыштау желісі және 115 мың тонна өнім өндіретін полимерлі жабын желісі жұмыс істеп тұр.
Жаңа кешен іске қосылғаннан кейін мырышталған болат өндірісі жылына 844 мың тоннаға дейін, ал полимерлі жабын өнімдері 254 мың тоннаға дейін артады. Сонымен қатар болат жолағының қалыңдығы мен еніне қатысты өнім түрлері де кеңейеді. Бұл өндірістік жаңарту құрылыс, машина жасау және инфрақұрылым салаларына арналған, бәсекеге қабілетті әрі импортты алмастыратын өнім шығаруға жол ашады.
