Қарағанды облысында күзгі-қысқы аңшылық маусымы ресми түрде 1 қыркүйекте басталып, ақпан айының ортасына дейін жалғасады. Дегенмен, әр аң мен құс түріне арналған аңшылық мерзімдері әртүрлі екенін ескеру маңызды. Бұл уақыттар облыстық орман шаруашылығы және жануарлар дүниесі аумақтық инспекциясы тарапынан бекітілген. Мамандар аңшылық – жай хобби емес, қатаң тәртіп пен шектеулерге бағынатын сала екенін еске салады. Ережелерді бұзу әкімшілік және қылмыстық жауапкершілікке әкеп соғуы мүмкін.
Қазіргі таңда қолданыстағы талаптарға сәйкес, келесі құстарға аңшылық жасауға рұқсат берілген:
-
30 қарашаға дейін – балшықшы, жылқышы, шіл, бөдене, көгершін және кекілік;
-
15 желтоқсанға дейін – суқұзғын, қаз (Қызыл кітаптағы түрлерінен басқасы), қырғауыл.
Жануарлар бойынша:
-
Қабан – 1 қыркүйектен 31 желтоқсанға дейін;
-
Борсық – солтүстік аймақта 15 қарашаға, ал оңтүстік аймақта 15 желтоқсанға дейін;
-
Суыр – інге кіргенге дейінгі мерзімде ауланады.
Кейбір аң түрлеріне маусым сәл кейінірек ашылады:
-
Ондатра – 1 қазаннан 15 ақпанға дейін;
-
Қарсақ, түлкі, ақкіс, дала күзен, америкалық қаракүзен, ақ қоян және шөл қояны – 1 қарашадан 15 ақпанға дейін;
-
Толай қояны – 1 қарашадан 31 қаңтарға дейін;
-
Сібір елігі, марал, бұлан – аналықтары мен төлдерін аулауға 15 қыркүйектен 31 желтоқсанға дейін, ал аталықтарын аулауға 15 шілдеден бастап рұқсат беріледі;
-
Қасқыр – 1 қарашадан 1 наурызға дейін.
Аңшылықпен айналысу үшін қажетті құжаттар қатарына мыналар кіреді: аңшы куәлігі, қаруды сақтау және алып жүру рұқсаты, аңшылық шаруашылығынан алынған жолдама және нақты жануар не құс түрін атуға берілген рұқсат қағазы.
Ережелерді сақтамағандар 5 айлық есептік көрсеткіш (АЕК) көлемінде айыппұл арқалайды. Аңшылық қағидаларын ұстану – өңір табиғатын қорғап, экожүйеге зиян келуінің алдын алуға септігін тигізеді.
