1 қыркүйек – Білім күніне орай Қарағанды облысында үш жаңа мектеп пайдалануға берілді. Екі мектеп – Қарағанды және Балқаш қалаларында «Келешек мектеп» ұлттық жобасы аясында салынса, үшіншісі – Қарқаралы ауданының Талды ауылындағы апатты мектептің орнына бой көтерді.
Жаңа оқу жылында облыс бойынша 175 мыңнан астам оқушы мектеп табалдырығын аттады. Оның ішінде 15 мыңнан астамы – бірінші сынып оқушылары, ал 7 мыңнан астамы – 11-сыныпты аяқтағалы отырған түлектер.
Балқаш қаласындағы жаңа мектептің ашылу салтанатына облыс әкімі Ермағанбет Бөлекпаев қатысып, тұрғындарды Білім күнімен құттықтады. Аймақ басшысы білім саласына мемлекет тарапынан ерекше көңіл бөлініп отырғанын атап өтіп, жаңа оқу орны соның айқын дәлелі екенін жеткізді.
– 1 қыркүйек – жас ұрпақтың білім мен тәрбиенің алғашқы қадамдарын жасайтын ерекше күні. Жаңа мектеп оқушылар үшін сапалы білім алып, жан-жақты дамуға мүмкіндік беретін орталыққа айналсын, – деді әкім.
Балқашта ашылған №12 жалпы білім беретін мектеп 900 оқушыға арналған. Заманауи оқу орны мультимедиялық жабдықталған интерактивті кабинеттермен, робототехника мен STEM-зертханаларымен қамтамасыз етілген. Сонымен қатар мектеп аумағында спорт және ойын алаңдары бар. Жаңа мектеп қаладағы оқушы орындарының тапшылығын азайтып, білім беру жүктемесін теңестірді.
Мектеп директорының міндетін атқарушы Гүлзада Манатаеваның айтуынша, мекеме педагогикалық құраммен толық жасақталған. Жаңа оқу жылында бес бірінші сынып ашылып, шамамен 120 бала қабылданған.
Ата-аналар да қуаныштарын жасыра алмады. Баласын мектепке алғаш рет әкелген Қуаныш Аманқұлов бұл күннің барлық отбасы үшін толқыныс пен үмітке толы екенін атап өтті.
Жаңа мектепке басқа білім ошағынан ауысқан 11-сынып оқушысы Риза Айдамиева бұл таңдауының дұрыс болғанын айтты. Ал сыныптасы Құмарза Жарқын мектептегі мүмкіндіктердің молдығына қуанып, әр оқушының өзін-өзі дамытуына барлық жағдай жасалғанын жеткізді.
Дайындық жұмыстары мен инфрақұрылым
2025–2026 оқу жылында облыста 420 мектеп өз жұмысын бастады. Жазғы кезеңде білім беру нысандарына ауқымды дайындық жұмыстары жүргізілді. 33 нысан – мектептер, балабақшалар, колледждер мен ерекше білім беру қажеттіліктері бар балаларға арналған орталықтар күрделі жөндеуден өтті. Сонымен қатар, 232 білім беру мекемесінде ағымдағы жөндеу жұмыстары жүргізілді.
